Tiun ĉi historion elpensis ne mi, sed mem la vivo. La monda gazetaro en 1968 informis, ke oni demaskis certan Matthias Defregger, help-episkopon de Munkeno, katolikan pastron, kiu dum la dua mondmilito en itala monta vilaĝo – kiel leŭtenanto de la germana armeo Wehrmacht – ordonis mortpafi multajn kamparanojn. Episkopo Defregger post la demaskado decidis veturi al Italio kaj mesi en tiu vilaĝo – sed la oficialuloj de Vatikano, timantaj plian skandalon, veturigis lin al iu monakejo. Ekde tiam oni ne plu aŭdis pri li.

Mi iom ŝanĝis la historion, ĉar pleje min interesis, kion estus faranta M.D., se tamen li estus alveninta al la loko de sia iama krimfaro? M.D. en mia historio ja ne estas katolika ĉefpastro, sed – same kiel en la reala vivo – li estas homo strebanta esti bonulo. Ĉu la nuna bono povas forgesi la iaman kulpon... ?

1982 La aŭtoro